مرايا عتيقة: بقلم اسامة أحمد رفعة
قصيدة
( مرايا عتمة )
جوه أوضتي
مكتب قديم
متخربش من كل الجهات
رامي عليه حقيقتي
وحتة من عمري اللي فات
وحبة ذكريات
متشالين في شوية حروف
جوه أوضتي
دولاب كبير
مليان أحلام كتير
ضاقت بيها الرفوف
جواه أوجاع كتير
مداريها عن العيون
مش كسوف
لكنه خوف
على كل حد
ساكن جوه دايرة حياتي
أو حتى كان م الضَيوف
جوه أوضتي
شباك وحيد
تملي باصص ع الحياة
من بعيد
وتملي خايف م الظروف
جوه أوضتي
كل الصور
متعلقين جوه الإزاز
بشريطة سودة رفيعة
ربطهم حَبل الزمن
فوق الحيطان الأربعة
ساعات كتير
أشوف في عينيهم فرح
وساعات كتير
أشوفها مدمعة
أقرب الناس كانوا
وأبعد الناس في الصفوف
جوه أوضتي
مافيش سرير
دوامة وكل يوم تبلعني
لحد أما أدوخ
ويجي الصبح ترميني
جوه الحياة
من غير حياة
مليان شروخ
مجرد اسم
متعبي جوه الكشوف
جوه أوضتي
مراية عتمة
مراية ضلمة زي متكون
مش عايزة تشوفني
بأشوف ....
كلمات / أسامة أحمد رفعت
تعليقات